Predsjednica Hrvatske Kolinda Grabar Kitarović gostovala je u Dnevniku HRT i govorila ,između ostalog, o svom ponašanju na Svjetskom prvenstvu u fudbalu.
Osim toga, govorila je i o Jasenovcu, ruskom predsjedniku Vladimiru Putinu, odnosima s Vladom Hrvatske ali i o ponovnom mandatu, piše Index.hr.
Kada je riječ o Jasenovcu ona je rekla da je za nju to “jako emotivno mjesto, a da se žrtvama voli pokloniti u tišini”. “Osuđujem bilo kakve manipulacije brojem žrtava”, rekla je ona.
“Nadam se da će sljedeća komemoracija biti u duhu zajedništva, da svi zajedno to organizujemo. A onda sam i ja, koja izbjegavam, spremna da se pridružim u cilju nacionalnog jedinstva”, rekla je Kolinda.
O Putinu i Rusiji
Govoreći o službenoj posjeti Rusiji 2017, kada ju je Putin ugostio u crnomorskom ljetovalištu Sočiju, ali i razgovoru s ruskim liderom na marginama Svjetskog prvenstva u fudbalu, Grabar Kitarović je rekla da je zahvaljući tome riješeno nekoliko otvorenih pitanja između Rusije i Hrvatske.
Kazala je i da se razgovaralo o uzvratnoj posjeti predsjednika Putina Hrvatskoj, koja zavisi od rasporeda ruskog predsjednika ali i njenog, ali da ta posjeta nije sporna.
Govoreći o Rusiji kao svjetskoj sili, kazala je da Hrvatska podržava taj pristup “dva kolosijeka” Evropske unije i NATO-a, u okviru kog se insistira na poštovanju međunarodnog prava, ali se isto tako uvažava i činjenica da se bez Rusije ne mogu riješiti goruća svjetska pitanja.
O popularnosti nakon SP-a i dočeku u Zagrebu
“Preko sedamdeset zahtjeva za intervjue iz cijelog svijeta, moram reći da to nisam očekivala. Ali bilo bi licemjerno reći da mi nije drago. Moramo se malo modernizovati, ući u trend, ljudi žele da vide naše mane i vrline, ljudske slabosti. Da osjete da respektujemo ljude. Meni je odlazak u svlačionicu, to je jedino mjesto gdje možete vidjeti igrače, to je jedini način da ja kao predsjednica mogu doći i čestitati im”, rekla je Kolinda.
“Imam utisak da ljudi u svijetu žele baš to, da pokažemo slabosti. Smatram da se protokol odnosi na one koji su u diplomatiji, a državnici su ti koji kreiraju moderni protokol. Ne postoje više ograničenja osim jednog, a to je ne uvrijediti domaćina na bilo koji način. Mimo toga, mislim da nam je, posebno na utakmici, dopušteno da se ponašamo kao ljudi. Reakcije su bile pouzdane, bilo je tu lažnih vijesti, ali sve u svemu bilo je jako pozitivno. Odbijam one tvrdnje da sam ukrala šou reprezentativcima. Da nije bilo njih, ne bi bilo prilike da ja uopšte izađem na teren. Ja sam u tom trenutku, dok su oni bili malo tužni, malo uz pomoć Putina i Makrona podigla raspoloženje”, istakla je hrvatska predsjednica.
Proslava u Zagrebu je, bez obzira na neke natpise, prošla besprjekorno, kazala je još Kolinda dodajući da se policija smješkala, a to u svijetu odaje utisak jedne sigurne države.
Da li je u kampanji za drugi mandat?
“Nisam u kampanji za drugi mandat, o tome nisam razmišljala. Uz našu reprezentaciju bila sam svim srcem. Da sam razmišljala o kampanji i nekakvim političkim posljedicama, možda bih se puno više suzdržavala u Rusiji i svjesno bih išla na to da ne izazovem nikakve nedoumice u hrvatskom društvu”, rekla je hrvatska predsjednica odgovarajući na pitanje hoće li nastaviti da radi u drugom mandatu i da li je u kampanji.
(Index.hr)
